مسرحية ببساطه زمن عباطه اللوحه الثانيه

مسرحية ببساطه زمن عباطه



اللوحه الثانيه

داخل شقة ابوالعريف..تبدو الصاله مثل الكهف المخيف .صورلجماجم بشريه ورؤؤس حيوانات...يسمع اصوات ضفادع وحيوانات.
يدخل عباطه وبصحبته عجلان وهم يرتعدان من شدة الخوف.

عباطه..(خائفاوعجلان يمسك فيه من شدة الرعب)...ماتمسك نفسك

يامعلم.انا جتتي مش خلصانه...؟

عجلان...ماتيجي قدامي ياواد ياعباطه..؟

عباطه....لا انت المعلم واشجع مني..(يدعو علي حنكش)..الله يخرب

بيتك ياحنكش كانت شوره مهببه.

عجلان....يمكن ربنا يجعل الخير علي ايده والبنت مايسه تحبني

عباطه...انشاء الله مش حتلحق تحبك..؟

عجلان...اسكت متفأرش فيها...هو فين اسمه ايه ده...؟

عباطه...اسمه اكيد دراكولا وتلاقيه بيمص قصب جوه.

عجلان...غريبه.الا مافيه صريخ ابن يومين ولا حد بيقلنا رايحين

فين...؟...امال فين الغفير...؟

عباطه...مش محتاجه غفير...دا اللي داخل محتاج يحرصه..؟

(يسمع صوت)

الصوت...اهلا بعجلان ابن المفش واللي امه اسمها ليه...؟

مرحبا بعائلة الضاني في بيت الأشباح.

عباطه..(يسيطر عليه الرعب)...لا ..احنا نرجع احسن يامعلم

احنا جينا للعفاريت برجلينا.

عجلان...اسكت بقي دول عارفين اسم امي...اموت واعرف جابوه منين

عباطه...اصلهم مخاويين ويعرفوا كل حاجه...هي اسمك اسمها ليه.؟

عجلان...اه...

الصوت...خليك مكانك ياعباطه ياللي امك دلاله.

عباطه...(معترضا لعجلان)...انت جايبنا عشان البت تحبك

ولا عشان نتهزق..؟

عجلان...الراجل مغلطش في حاجه..مش امك دلاله بصحيح..

عباطه...(ساخرا)..اه وبتلملك اللحمه م الجمعيات وانت

تقول لاهل الحاره انك لسه دابح جاموسه.

عجلان..(غاضبا)..انت بتقول ايه ياواد...؟

عباطه..انا بقول الحقيقه قبل مايقولها هو ويفضحنا.

(يدخل ابوالعريف وعباطه وعجلان يرتجفان من الخوف)

ابوالعريف..(محدثا عباطه)..ماتخافش ياعباطه..كل اللي قلته

انا عارفه.

عجلان...(وهو خائف)..بسم الله الرحمن الرحيم

عباطه...(مكملا)..وبه نستعين من الشيطان الرجيم..الله يخرب

بيتك ياحنكش.

ابو العريف...مالكم ..فيه ايه..؟..ماتخافوش...؟

عجلان...مانخافش ازاي...انت مين..؟

عباطه...تلاقيه خدام العفاريت.

ابو العريف...انا مش خدام حد ..انا اللي انتوا عاوزينه

انا ابو العريف.

عجلان...انت اللي بيقولوا عليك بتحل العقد..؟

ابو العريف...ايوه انا.

عباطه...وشبهنا...يعني بني ادم..؟

ابو العريف..ايوه نا قدامك اهو..؟

عباطه...مش مبلوعه...بس ماشي.

ابوالعريف...طلباتكم...ظ

عباطه...انا كل طلباتي ادخل الحمام.

ابوالعريف (يشير الي احد الاماكن)..ادخل من هنا تلاقي الحمام

علي ايدك ايمين.

عباطه...لا...مش داخل.

ابو العريف ...ليه..؟

عباطه...خلاص اتصرفت بمعرفتي.

ابوالعريف ..(محدثا عجلان)..وانت يامعلم.

عجلان....انا اتصرفت من زمان ومش عاوز الحمام.

ابوالعريف..(يبتسم)...لا ما اقصدش..ااقصد طلباتك ايه

وجايلي ليه.

عجلان...انا جيتلك عشان تعملي حجابين..حجاب محبه يخلي البت

مايسه تحبني...وحجاب كره يخليها تكره الواد عادل.

ابوالعريف...ومايسه تبقي البنت اللي انت بتحبها وواخد

منها بمبه ومش معبراك وبتحب واحد اسمع عادل..صح.؟

عباطه..وهي لو معبراه كنا شفنا خلقتك.الله يخرب بيتك يامايسه

..يارب تتشحوري زي ماشحورتي المعلم وراكي.

ابو العريف..واضح ان الموضوع كبير وصعب ومعقد.

عجلان...كبير قوي والله..انا دايخ وراها بقالي سنتين مافيش

حاجه في الدنيا ماعملتهاش عشان تقربني منها.

ابو العريف...ماتخفش يامعلم .كله حيبقي تمام..انا ابوالعريف

اللي يعرف كل حاجه..؟

عجلان...يعني حتعملي حجاب وحيعمل شغل مع مايسه وتحبني.

ابو العريف..حجاب ايه ياجاهل..انا ماليش في الشغل البلدي

ده...؟

عجلان...امال حتحبني بأنهي شغل...؟

ابو العريف...حخليها تحبك مش بالحجاب والكلام الفاضي ده

احنا في القرن الواحد والعشرين.قرن الفكر.قرن

الفهلوه.قرن الكمبيوتر..قرن الأنترنت..؟

عباطه...البهايم دي اول مره اسمع عنها يامعلم..انت تعرفها.؟

عجلان..لا ياواد ياعباطه ولا قرن بهيمه من دول اعرفه

(محدثا ابو العريف)..هي بتتباع بالكيلوا ولا الراس.

ابوالعريف...ايه دي يامعلم...؟

عجلان...البهايم اللي قلت عليها دلوقت..مش انت عمال تقول

قرن ايه..وقرن مش عارف ايه وقرن ابصاري ايه..؟

ابو العريف (ضاحكا)...اه ..القرن ده يامعلم..ده مش بهيمه

..القرن ده مية سنه...؟

عجلان...كندوز يعني...؟

ابوالعريف...يمعلم احنا في العصر الحديث..عصر التكنولويا.؟

عباطه...ياحلاوه حتعصروا اللوبيا....؟

ابو العريف...لوبية ايه وعصير ايه ياعباطه..انا بقصد اني

اعرفكم ان الفكر بيتطور ودلوقت فيه نت وفيس
بوك وتويتر وياهو.

عجلان (محدثا عباطه وهو مندهش)..انت فاهم حاجه ياواد.

عباطه...اه فاهم...؟

ابوالعريف...فهمت ايه ياعباطه..

عباطه..انت مش بتقول ياهو..

ابوالعريف...اه...

عباطه..يعني الحقونا ياخلق هووووووووو..؟

ابوالعريف...(يضحك)..دي مواقع ع النت ياجماعه.

عجلان...والنبي ياعم بلاش الكلام المجعلص..انت فهمني بالبلدي

حتخلي مايسه تحبني ازاي..؟

ابو العريف...ادوني شوية معلومات.

عجلان...مش فاهم حاجه..؟

عباطه...ولا انا فاهم...(محدثا ابو العريف)..ياعم خلي مايسه

تحب المعلم ونديك اللي عاوزه.

ابوالعريف...انتوا مش فاهمني برضه..انا عاوز معلومات..يعني

احكولي عنها شويه...شكلها مثلا...؟

عباطه...زي الجاموسه...قصدي عروسه.

عجلان...هي زي القمر يااسمك ايه..؟

ابو العريف...هواياتها ايه...؟

عجلان ...حترجع تاني تجعلص الكلام...

عباطه..(محدثا عجلان)...ياعم انت خليك معانا واحده واحده


..وراعي ان قدامك اتنين بهايم...؟

ابو العريف...حاضر...بلاش هوايتها...هي بتحب ايه..؟

عباطه...بتحب الواد عادل اللي غايظ المعلم..

ابو العريف...مش قصدي بتحب مين ..هيه بتحب ايه..؟

عباطه...بتحب البطاطس الشيبسي..كل يوم ماسكه كيس ف الحاره.

ابو العريف...(غاضبا)...اللهم ماطولك ياروح..يابني ياحبيبي

بقصد هيه بتحب ايه من الهوايات..مزيكا.رسم.شعر..؟

عجلان...ايوه هي التالته دي.

عباطه...صح يامعلم...هي بتفرد شعرها لحد تحت.

عجلان..(ساخرا من عباطه)..ياجاهل هو عاوز يعرف شعر الكراس

مش شعر الراس.

عباطه...وانت عرفت منين يامعلم..؟

عجلان...سمعتها بتتخانق مع الواد عادل وتقوله غني غنوة

الملوخيه اللي عملتهالك هي اللي حتمشي دلوقت..والواد

عادل يقولها...لا انا مااطبخش الغنوه دي.

ابو العريف..(فرحا)...بس..خلاص..كده المشكله اتحلت..برافو

عليك يامعلم..؟

عجلان...اتحلت ازاي...؟

ابو العريف...هيه مش عندها اغنية الملوخيه يامعلم وجاهزه.

عجلان...معرفش يمكن تكون صبختها.

ابوالعريف...مش حتلحق...احنا بقي اللي حنطبخ الملوخيه.

عباطه...انا مش فاهم...احنا حنفتح مسمط..؟

ابو العريف...لا ...احنا حنفتح شركة انتاج كاسيت.

عجلان...كست . كراجل...مش مهم..المهم هيه تحبني وبس.

ابو العريف...دي حتحبك وتموت فيك..انت حتفتح لها ابواب

المجد والشهره.

عجلان...ازاي فهمني..؟

ابو العريف...احنا حنفتح شركة انتاج ونعلق اعلان في الحاره

ونقول عاوزين مواهب جديده.

عباطه...مراهم جديده..؟

ابو العريف...مواهب ياابني..مش مراهم..يعني اللي بيكتب شعر

غنائي...واللي يلحن...واللي يغني.

عباطه....لا بقي ماحدش يغني غيري.

عجلان...وانا موافق ياواد ياعباطه..هي ناقصه يجي مغنواتي

تاني ياكل مني البت..وبعدينا لحمتنا تبقي من تلاجتنا.

ابو العريف...ماشي ومش حتفرق..السوق بيقول اي حاجه..عباطه

يغني وماله يغني ماهي سداح مداح.

عجلان...وهي بقي حتحبني ازاي..؟

ابو العريف..احنا لما نعلق في الحاره الاعلان هيه حتقراه واكيد

حتيجي هيه وعادل اللي بتقولوا بتحبه.

عجلان...وماتجيش لوحدها ليه...؟

ابو العريف...مش مهم...مااحنا حنسقط عادل ونجح مايسه

وحتبقي قدام عنيك علي طول..وحيبقي فيه صحافه

وتلفزيون ينسوها عادل وابوه كمان

عباطه..(مندهشا)...ياابن الايه...دا انت ابن جنيه.

ابو العريف ..(محدثا عجلان)...بس الموضوع ده حيصرف فلوس

كتير..كتير قوي..

عجلان...يصرف زي مايصرف..المهم الدبيحه تيجي لحد عندي.

عباطه...(محدثا عجلان)...وانا اغني يامعلم..؟

عجلان...تغني ونص ...هما اللي بيغنوا احسن منك...


بلاك اوت
................................سمير حمايه