يا غزة لن تموتي فطلابك قادمون

مسرحية ببساطه زمن عباطه اللوحه الثالثه

استعرض الموضوع السابق استعرض الموضوع التالي اذهب الى الأسفل

مسرحية ببساطه زمن عباطه اللوحه الثالثه

مُساهمة من طرف Admin في الأحد يونيو 19, 2011 2:47 pm

سمير حماية - 11 أكتوبر، 2010

Photo 8 sur 80 Retour à l'album · Photos de سمير · Profil de سمير




مسرحية ببساطه زمن عباطه

اللوحه الثالثه

داخل شركة عجلان للانتاج الفني...صاله كبيره..مكتب كبير معد للجنة

اختيار المواهب..كرسي امام المكتب...انتريه متناثر علي جانبي

المكتب..

(يدخل عباطه مرتديا بدله غير متناسقه معه.الوانها فضفاضه

كرافت طويل وعريض الحجم..نظاره شمسيه..

عباطه..(ممسكا بورقه ويغني)...ياعم ياللي بتغني وتقول الغني

مش اي حد يغنيه..دا الغني بحر واي حد ممكن يستحمه فيه

...واحد وخمسين ياليل واحد وخمسين ياعين.

(يدخل ابوالعريف)

ابو العريف..(ساخرا)..واحد وخمسين ايه ياعباطه..انت بتغني

حساب.

عباطه...مش انتوا اللي كاتبينها..؟

ابو العريف..(ساخرا)..يعني انت بتعرف تقرا..وريني الورقه.؟

عباطه..(يناول ابوالعريف الورقه)..خد (ويشير الي كلمة

اه يا ليل اه ياعين)..دي بقي مش واحد وخمسين ياليل

وبعدها واحد وخمسين ياعين.

ابو العريف..(يضحك)...واحد وخمسين ايه..دي اه ياليل.اهياعين.

عباطه...دي تبقي اه..؟

ابو العريف..ايوه..وبعدين مش فاضيين للكلام ده..الملحن

زمانه علي وصول.

عباطه..ملحم ..ملحم مين...؟

ابوالعريف...اللي حيعلمك المزيكا.

(تدخل سعديه ملحن وتحمل عود في يدها)

سعديه...سعديه سعداوي..ملحن موسيقي.

ابو العريف (يعرفها بنفسه)..ابو العريف عرف الديك مدير

الشركه.

سعديه...تشرفنا يااستاذ ابو العريف (تشير الي عباطه)

والاستاذ.

ابو العريف...ده يبقي عباطه مطرب الشركه والوجه الجديد.

سعديه...(ساخره)...ده المطرب.

عباطه..ايه مش عاجبك انا..؟

ابو العريف..(محدثا عباطه)..لا عاجبها ونص..(يلتفت محدثا

سعديه)...ايه يااستاذه انت تلحني وتقبضي وبس.

سعديه...مافيش مشاكل يااستاذ .نو بروبلم

عباطه..(يشير الي العود في يدها)..وايه الفخده اللي ماسكاها

في ايدك دي...؟

سعديه..(ساخره)...فخدة ايه يااستاذ..ده عود

ابو العريف...(محدثا عباطه)..ماتنسي الجزاره بقي ياعباطه

ده عود حتلحن عليه الاغاني..؟

عباطه...تلحم بيه الاغاني ازاي..؟

سعديه..(غاضبه)...الحم ايه وانيل ايه..انت مطرب ولا سمكري.

عباطه...لا صبي جزار...؟

ابوالعريف...العود ده حيفهمك مقام كل اغنيه.

عباطه...هيه الغنوه ليها مقام..؟

سعديه...ايوه يابني..هو انت فاكر ايه..؟

عباطه...شلاه ياسيدي...سيدي..سيدي ايه بقي..؟

ابو العريف...ياعباطه المقام بتاع المزيكا غير المقام اللي

انت تعرفه..؟

سعديه..(مندهشه)...هو فيه مقامات تانيه...؟

ابو العريف...لا بس عباطه فهم غلط..عشان هو مايعرفش غير

مقامات الاوليه.

سعديه..(تضحك)...اه فهمت..(محدثه عباطه)..ياابني ياحبيبي

مقامات المزيكا...بياتي وصبا ونهاوند وسيكا.

عباطه...دي المقامات بتاعتكم..؟

سعديه...ايوه...؟

عباطه...وسيدي سيكا كان ايه..؟

ابو العريف...(ساخرا)..سيدك سيكا...انت حتودينا في داهيه

خلصونا وخلونا نستعد.

(يدخل عجلان مرتديا بدله غريبة الاطوار ايضا)

عجلان...ايه عملتوا ايه...؟

ابو العريف...ايه الشياكه دي يامعلم..؟

عجلان...شكلي زي البهوات مش كده...؟

ابو العريف...واجدع من البهوات كمان.

سعديه...ياجماعه خلونا في الشغل..؟

عجلان..(محدثا ابو العريف)...ومين الست المكعبره دي..؟

ابوالعريف...دي الاستاذه سعديه التي حتلحن الاغاني لعباطه

وتمتحن المواهب اللي حنقابلها.

عجلان...ودي بتلحم كويس...؟

ابو العريف...دي من احسن الملحنين اللي في السوق..بس مش

لاقيه فرصتها.

عجلان....علي ضمانتك.

ابو العريف...ايوه يامعلم..واحنا دلوقت جاهزين للاختبارات

وحنقعد انا وانت وعباطه والاستاذه اعضاء لجنه

بس احنا مش حنتكلم ونسيب الاستاذه تمتحن وتختار.

عباطه...واحنا مانخترش ليه..؟

ابو العريف...هو احنا بنفهم حاجه في المزيكا ياعباطه..؟

عباطه...لا..؟

ابو العريف...يبقي نسكت احسن.

عجلان....انت شايف كده..؟

ابو العريف...اه..

عجلان...خلاص ماشي احنا نعاين بس المواشي.

ابو العريف...مواشي ايه..ماشي يامعلم ابقي عاين بس من

بعيد بينا نقعد كلنا علي المكتب.

(يجلس الجميع كأعضاء لجنه )

ابو العريف..(ينادي علي الساعي)..ياعثمان.

(يدخل عثمان الساعي النوبي)

عثمان...تحت امركسيد بوريف..نجيب قهوه.

ابو العريف...لا..دخل رقم 1 اسمها كهربا.

عثمان...(ينادي)...رقم واحد كهربا.

(تدخل كهربا فتاه ترتدي ملابس مثيره واعضاء اللجنه

في زهول)

عجلان....ان جيتوا للحق هي كهربا..

ابو العريف...اه الفولت عالي قوي يامعلم..

عباطه ...انا حاسس ان جتتي حصلها ماس..انا اتكهربت يامعلم.

عجلان...امسك الخشب ياواد ياعباطه..(يهمس لعباطه)..حتتة

بتلو جامده قوي ياواد.

ابوالعريف..(يحاول ان يتماسك)...خلونا في الامتحان ياجماعه

(يشير الي كهربا يالجلوس)...اتفضلي يااستاذه.

سعديه...اتفضلي اقعدي..

كهربا..(تتحدث بمياصه)...حاضر يااستاذه (تجلس).

عباطه...(هامسا لعجلان)...صوتها حلو يامعلم..حاسس ان حرارتي

زادت.

عجلان...ياواد لو حرارتك زايده شغل المنظم..احسن يضحكوا

علينا.

سعديه...متهيألي كهربا ده اسم الشهره بتاعك.

كهربا...ايوه ده اسم الشهره واسمي الحقيقي بهيه.

سعديه...وغنيتي فين قبل كده ياكهربا.

كهربا...بغني في الافراح والموالد والطهور.

عباطه...يابخت الطهور بيكي.

سعديه..(مقاطعه عباطه)..استني شويه لو سمحت.(تعود محدثه كهربا

)..وبقالك كام سنه بتغني...؟

كهربا...بقالي سنتين.

سعديه...طيب سمعينا حاجه.

كهربا...تحبوا تسمعوا ايه..؟

عباطه...اي حاجه منك حلوه وحتتسمع.

كهربا...حغني لروبي.

سعديه...لا غني حاجه فيها مزيكا وطرب غني لام كلثوم .اصاله.

كهربا...بس انا مش حافظه غير روبي.

عجلان...غني للي عاوزه تغنيله ..بوبي .حصاله..قولي اللي

تعرفي تقوليه.

عباطه..اه صح يامعلم (محدثا سعديه)..انت مجعلصاها كده ليه

غني ياكهربا وولعي فينا.

كهربا...(تغني لروبي)...انا كل ما اقوله اه..هو يقولي لا.

عباطه...(يصفق)...الله تنجح يامعلم.

سعديه...بس.

عجلان...مابسش ولا حاجه..ماشي..اعملي حاجه لله .البنت منكسره.

عباطه...اه والنبي ماتقطعيش النور.

كهربا..(فرحه)...يعني انا نجحت.

عباطه...اه نجحتي.

كهربا...متشكره قوي (تقترب من سعديه لتقبلها وسعديه ترفض

ويبدو عليها الضيق).

عباطه..(محدثا كهربا)...سيبك منها وتعالي بوسيني انا والمعلم.

(كهرباتقترب من عجلان وعباطه لتشكرهم وعباطه يقف

ويخرج من وقاره ويغني لروبي)

ابو العريف..(محدثا كهربا)...خلاص يااستاذه نشوفك الاسبوع

اللي جاي...

(تخرج كهربا وابو العريف يرن الجرس..يدخل عثمان)

عثمان...نجيب حلبه حصا

ابو العريف...حلبة ايه ..دخل اللي بعده.

عثمان...(ينادي)..عادل محروس.

(يدخل عادل وبصحبته مايسه والاستياء يظهر علي الجميع)

عجلان...(محدثا عباطه)...البس النظاره ياولا عشان مايعرفوناش.

عباطه..(يلبس النظاره)...ماشي ياسيد المعلمين.

ابو العريف..(محدثا عادل)...الاستاذه دي بتعمل ايه معاك.

عادل...دي خطيبتي.

ابو العريف..(ساخرا)..خطيبتك بره ..في الشارع..احنا في

امتحان يااستاذ مش في زهه.

عجلان...(هامسا لابو العريف)..عفارم عليك..اديله البارد ده.

عباطه...أه والنبي تهزأهولنا شويه.

ابوالعريف...(محدثا مايسه)..لو سمحتي يااستاذه ومن فضلك

استني بره.

مايسه....انا جايه للشعر الغنائي.

ابو العريف...لما يجي دورك نبقي ننده عليك

(تخرج مايسه)

سعديه..(محدثه عادل)..اتفضل يااستاذ.

(عادل يجلس)

عباطه...بذمتك ده شكل واحد يغني.

عجلان...لا مش باين عليه ريحة الغني.

عباطه...(محدثا عادل)...ساقط ..ساقط انشاء الله.

سعديه...قولي بقي بتغني لمين ياعادل.

عادل...بغني لكل مطربينا العظام.

عجلان..(معترضا)...ولا مالكش دعوه بالعضم والمواسير.

سعديه...عضم ايه ومواسير ايه يامعلم..هو بيقول بيغني

لمطربينا العظام..يعني الكبار.

عباطه...ودول ليهم في العضم برضه.

سعديه ..(ساخره)..لا مالهمش..(محدثه عادل)..قول ياابني

تحب تغني لمين..؟

عادل...انا حافظ كل اغاني ام كلثوم وعبد الحليم والشيه سيد

درويش.


عجلان...انت يتعرفهم ياواد اللي قال عليهم..؟

عباطه ..لا معرفهمش..

سعديه..(محدثه عادل)..ماشاء الله عليك.

عجلان ..(معترضا)..ماشا الله علي ايه..هو احنا شوفنا حاجه

وماتنسيش نفسك يااسمك ايه.

سعديه...حاضر يامعلم..قصدي يااستاذ (محدثه عادل)..سمعنا يااستاذ


عادل...ممكن اخد العود...؟

سعديه...مافيش مانع..

عادل..(يمسك العود)...ويغني وقف الخلق ينظرون جميعا..كيف

ابني قواعد المجد وحدي.

عباطه..(مقاطعا)...ايه ده..ده غني برضه..ايه وقف دي..وقف

وقف ايه يامعلم.

عجلان.....مش فاهم حاجه...انا كل اللي فهمته انه شغال بنا

لوحده وماحدش بيناوله.

عادل..(محدثا سعديه)...انا قلت وحش يااستاذه.

سعديه..(بأسي وتعاطف مع عادل)..معلش ياابني..غني حاجه تانيه.

عادل...(يغني من جديد)...الحلوه دي قامت تعجن م الفجريه

والديك بيأذن كوكو كو كو من الفجريه.

عجلان...اهو ساب البنا ودخل ع العجين.

عباطه...ياابني بلاش شغل الفرانين علينا...عندك حاجه عدله

تقولها قولها...ماعندكش روح وريحنا.

سعديه...(محدثه عادل)...قول حاجه تانيه ياابني.

عادل...(يغني مداح القمر)..عاشق ليالي الصبر مداح القمر

عشق العيون السمر غواني السهر..لولا النهار في

جبينك لولا ..ما كنت حبيت ولا حسيت بطعم الحب ياعمري

قدك المياس ياعمري ..ايقظ الاحساس

عجلان..(مقاطعا)...الواد ده بيفرسني.

عباطه...انت عاجبك صوته

عجلان...لا...ده وحش خالص.

ابوالعريف...(محدثا سعديه)...خلاص يااستاذه سعديه ماينفعش.

عادل...طيب ممكن اعرف ايه العيب اللي فيه..؟

عباطه...كلك وحش ومابتعرفش تغني.

سعديه..(محدثه عادل)...كل وقت وله أذان ياابني

(يخرج عادل ويدخل عثمان)

عثمان....نجيب لكم موغات.

ابو العريف...ياعمي موغات ايه..؟..انده علي اللي بعده

عثمان...دي واحده ست اخر حاجه.

ابوالعريف...ايوه..مايسه صادق.

(عثمان ينادي مايسه صادق...تدخل مايسه ويخرج عثمان)

مايسه...مساء الخير عليكم.

عجلان...مساء النور ع البنور.

ابوالعريف..(هامسا للمعلم عجلان)...امسك نفسك يامعلم.

سعديه...اتفضلي يااستاذه (تشير اليها بالجلوس)

مايسه...معايا كل كلماتي.

عجلان...خلاص نجحتي..

سعديه...استني نشوف الكلمات.

ابوالعريف..(هامسا لعجلان)...الاستاذه سعديه معاها حق

عشان مايسه ماتشكش في حاجه يامعلم.

مايسه..(تمسك بورقه وتقرأ)...مش بايدي هجرتك..مش بايدي

مش بايدي فارقتك ..مش بيايدي

مش بايدي انسي الجراح..

مش بايدي اداوي الجراح

مش بايدي.....

عجلان..(يصفق بحراره)...الله الله ادي الغني ولا بلاش.

سعديه...بس يامعلم..؟

ابو العريف..(محدثا سعديه)..كويسه ومش بطاله نجحهيها.

سعديه...بس الكلمات مكسوره.

عجلان...مكسوره...مشطوفه...انا عاوزها كده.

سعديه...خلاص...مبروك ياانسه مايسه.

بلاك اوت
avatar
Admin
Admin

عدد المساهمات : 647
نقاط : 1469
السٌّمعَة : 6
تاريخ التسجيل : 09/12/2010
العمر : 30

معاينة صفحة البيانات الشخصي للعضو http://tolabo-ghaza.forumalgerie.net

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى